Iazko arrakastari jarraituz, festen atarian bizikleta lasterketak egin dituzte Sanjuandegi auzoan. YK Riders taldeak eta XJ Auzolanean batzordeak elkarlanean antolatu dute kirol egitasmoa, eta 3 eta 12 urte bitarteko hainbat lagunek gozatu ahal izan dute bizikletaren gainean.
Adinaren arabera banatuta egin dituzte probak 16:30en bueltan hasita. Aurrena, 3 eta 4 urte bitarteko umeak aritu dira Jose Antonio Agirre plazaren inguruan osatu duten zirkuituan bueltaka. 5 urtetik gorakoak, berriz, auzoan barrena ibili dira txirrinduaren gainean, zirkuituaren ibilbidea osatzen. 7 urtetik gorako partaideek, ostera, hainbat itzuli eman dizkiote Sanjuandegin prestatutako zirkuituari.
Gogotik gozatu dute txirrindulari gaztetxoek gaur arratsaldean; izan ere, atzoko Umeen Egunaren ondotik, eta festak iristear diren erakusle, hainbat umek bizikletan ibiltzen abilak direla erakutsi. Probak egin badituzte ere, ez dute sailkapenik osatu; lagunarteko hitzordua izan da gaurkoa. Hori bai, partaide guztiek goxokiak jaso dituzte saritzat. Gainera, bizikleta eta kasko bana zozkatu dituzte parte hartzaile guztien artean.