Sorginorratzak kultur eskaintza herrikoia Azpeitiko hiru ikastetxeetako guraso elkarteetako ordezkariek abiatutakoa da, Kulturaz kultur kooperatibarekin elkarlanean eta Azpeitiko Udalaren babesarekin. 2025-2026 ikasturteko emaitza "oso positiboa" izan dela ikusita, datorren ikasturtean (2026-2027) berriro eskaintzea erabaki dute, gaztetxoei hainbat kultur diziplina probatzeko eta horiekin esperimentatzeko aukera eskainiz. Izena emateko epea ekainaren 19ra artekoa da, eta honako loturan egin beharko da.
Datorren urteko Sorginorratzak eskaintzan bi talde osatuko dituzte: 8-10 urte (LH3-4) arteko ikasleena izango da bata, eta 10-12 urtekoena (LH5-6) bestea. Bi taldeek asteazkenetan izango dituzte saioak: lehenengo taldeak 17:15etik 18:15era eta bigarrenak 18:30etik 19:30era.
Bi taldeek hainbat diziplinatako zortzi tailer izango dituzte, diziplina bakoitza lau saiotan landuz. Hala, Dinamoa sormen guneko hitzaren, irudiaren, soinuaren eta gorputzaren eremuetan sortzeko, ikasteko eta jolasteko aukera izango dute Sorginorratzaken parte hartzen dutenek. Hona hemen Sorginorratzaken eskuorria.