Azpeitiko Eskola Kirolaren ordezkariek Eusko Legebiltzarreko Kultura, Euskara eta Kirol Batzordeko kide Irune Zuloaga, Ima Garrastatxu, Rebeka Ubera, Josu Aztiria eta Itsaso Asensioren bisita jaso zuten atzo Basazabal jauregian. Eredu egokiak diren esperientziak ezagutzeko bisiten barruan egin zuten atzoko bilkura Legebiltzarreko ordezkariek, Azpeitiko Eskola Kiroleko ordezkariekin.
Herrian Eskola Kirolak izandako ibilbideaz gainera, gaur egungo antolaketa ereduaren berri eman zien legebiltzarkideei atzoko bilkuran, eta etorkizuneko erronken inguruan ere hitz egin zuten.
Izen ematea irekita
Azpeitiko Eskola Kirol Elkarteak gogorarazi du 2026-2027 ikasturteko izen ematea bukatuta egon arren, bateren batek izena ematea nahiko balu, oraindik ere aukera izango lukeela, eta hori lehenbailehen egitea komeni dela, "antolaketa egokia ahalbidetzeko". Eskola Kirolean izena emateko lotura honakoa da, bertan eman daiteke izena eta datorren ikasturterako programazioa ere ikus daiteke.