Xanti Agirrezabala eta Alaitz Olaizolak zuzendutako Antzerki Eskolako gaztetxoek gaur oholtzaratu dituzte urtean zehar gorpuzten aritu diren obrak, eta kanpoan eguraldi ederra eginagatik, jende ugari bertaratu da Soreasu antzokira aktore gazteen lanak ikustera.
Aurrena, Agirrezabalak zuzendutako Harria antzezlana eskaini dute, ordubete inguru iraun duena. Dozenaka gazte artista igo da oholtzara askotariko roletan. Ondoren, Bum! eta Supers antzerki obrak eskaini dituzte urtean zehar Olaizolaren gidaritzapean aritu diren gazteek.
Aktore gaztetxoek haien irakasleen lana eskertu nahi izan dute, eta lore sorta bana eman dizkiete. Antzerki artean gogoratu dutenez, dagoeneko hogei urtetik gora daramatza Azpeitiko Antzerki Eskolak, eta martxan jarraitzeko nahikoa harrobia badagoela ikusi da gaurkoan.