Jubilatuen eta Pentsiodunen Plataformako kideek uda aurreko azken elkarretaratzea egin zuten atzo, astelehena. Opor aurreko azken hitzordua izanik, kontzentrazioaren ostean mokadutxoa egin zuten mobilizaziora joandako herritarrek Azoka Plazan.
Astez aste elkartu dira hainbat lagun pentsio duinen aldeko aldarriak plazara eramateko, eta udako etenaren ostean, irailean ekingo diote kontzentrazioei; hil horren 14an, astelehenez, egingo dute hurrengo kontzentrazioa.
Elkarretaratzeekin segituko dute, plataformakoek azaldu dutenez, bizitza duina izateko lanbide arteko gutxieneko soldataren pareko diru sarrera behar duelako jubilatu orok. Horregatik, Azpeitiko jubilatu eta pentsiodun denei protestetara batzeko deia egin diete plataformako kideek.
