Gaur, 12:00etan, txupinazoa botata hasi dituzte sanferminak Iruñean, baina aurten udal udalekuetako umeek ez dute egingo hainbat urtez jai horien bueltan Azpeitian ospatu izan duten San Fermin Txiki eguna. Udalak azaldu duenez, udalekuetako lantaldeak hartu du erabakia, eta erakundeak ez dio horri eragozpenik jarri. "Udalekuetako lantaldetik etorritako eskaera izan da aurten ez egitea. Beraiek ibiltzen dira urtez urte umeekin lanean, eta beraiek dakite ondoen udalekuetako ekintza horrek zer balorazio izan duen aurreko urteetan", zehaztu du erakundeak.
Udalak azalpen gehiago ere eman ditu, eta esan du ekitaldi hori ume batzuei asko gustatzen bazaie ere, kontrako kasuak ere badirela: "Zezenez jantzitako begiraleekin beldurtu egiten dira ume batzuk; entzierro edo jai giroko ekitaldi bat beharrean lasterketa edo kros bezala hartzen dute helduxeagoek; korrikaldi eta jende artean estuasuna pasatzea ere ohikoa da; suziriekin izutzen direnak ere badira...". Ekitaldi hori herritar eta guraso askoren "gogokoa" izanagatik, umeentzat baino herritarrentzako ekitaldia zela argudiatu du, halaber.
Horregatik, udalekuetan umeen ongizatea kontuan hartzeko ahalegina egiten dela eta hezitzaileek programazioa egiten lanketa handia gauzatzen dutela ere esan du. "Udalekuetako lantaldeak egin zuen ekitaldia ez antolatzeko eskaera, eta hori kontuan hartuta, udalarentzat lantalde horren irizpidea da egokiena. Horregatik, udalak ez du aurten San Fermin Txiki eguna ez egiteko eragozpenik jarri".