Klima aldaketari buruz hausnartzeko eta ohitura jasangarriagoak sustatzeko ekintza izango da bihar eta etzi Azpeitiko Ekoetxean. Terminus izenpean, aldaketaren escape jolasa egingo dute parte hartzaileek, larrialdi klimatikoaren aurrean aldaketek zer garrantzia duten landuz. Bi egunetan 10:00etatik 12:30era egingo dute jolasa.
Jarduera gazteei eta helduei zuzenduta dago, eta 12 urtetik gorakoek parte hartu ahal izango dute. Esperientzia euskaraz izango da, eta doakoa; aurretik, baina, izena eman beharko da Ekoetxearen webgunean.
Jardueraz betetako hilabetearen ondotik, abuztuaren 29an egingo dute hileko azken esperientzia Ekoetxean. Egun horretan animalia basatien arrastoen atzetik ibiliko dira hala nahi duten herritarrak Ekoetxean kokatuta dagoen Egibar etxean eta haren atarian. Familiei zuzendutako hitzordua 10:30erako jarri dute, eta aurrez izena eman daiteke honako lotura honetan.