Iruña Okara (Araba) ibilaldia antolatu du Baigera jubilatuen eta pentsiodunen elkarteak irailaren 24rako. Jada zabaldu dute irteerarako izena emateko epea, eta herritarrek irailaren 23ra arte izango dute horretarako aukera. 40 euro ordaindu beharko du partaide bakoitzak.
Irailaren 24an, ostegunez, 09:00etan abiatuko da autobusa Azpeitiko San Martin egoitza paretik Arabara. Santa Katalinako lorategi botanikoa bisitatuko dute goiz partean, eta Gasteizko Conde de Alava jatetxean bazkalduko dute gero. Arratsaldean itzuliko dira atzera Azpeitira.
Bestalde, urriaren 1ean ospatuko dute aurten Pertsona Helduen Nazioarteko Eguna, eta aurtengoan ere bazkaria antolatu du Baigerak egun horretarako. Aurretik, 13:00etan elkarretaratzea egingo dute plazan, eta 13:45ean azoka plazako ateak irekiko dituzte bertan bazkaldu ahal izateko. Divinus katerinak zerbitzatuko du aurtengo bazkaria, eta bazkalostean erromeria izango da DJ Arnoren eskutik. Egun horretako bazkarian izena lehenbailehen ematea komeni dela adierazi dute Baigerakoek; 25 euro ordaindu beharko du partaide bakoitzak.