Lizartzako Dantza Solte Txapelketa jokatu zuten igandean Lizartzan (Gipuzkoa), eta azkenaldian bolada ezin hobean dabilen Azpeitiko bikoteak jantzi zuen han ere txapela: Jone Arriaranek eta German Aranburuk osatutako bikoteak, hain zuzen ere. Bigarren, Julen Lertxundi (Asteasu, Gipuzkoa) eta Nora Davila (Villabona, Gipuzkoa) sailkatu ziren, eta hirugarren, Danel Castillo (Pasai-Donibane, Gipuzkoa) eta Irati Larrañaga (Andoain, Gipuzkoa).
Guztira, sei bikote izan ziren lehian. Bikoteek zortzi pausoko fandangoa eta arin-arina dantzatu zituzten, trikitilarien laguntzarekin. Epaimahaiak pausoak, goikaldeko mugimendua, alderdi artistikoa, eta melodia-erritmoa izan zituen kontuan puntuak ematerakoan. Lehen hiru sailkatuen ostean, besteen sailkapenik ez zen izan; zozketa bidez zerrendatu zituzten sari banaketa ekitaldian. Hauek izan ziren txapelketa osatu zuten bikoteak: Onditz Esnaola (Lizartza) eta Gorka Granado (Sopela, Bizkaia); Ione Aranberri (Itziar, Deba, Gipuzkoa) eta Beñat Mendizabal (Azpeitia); eta Amane Uranga (Tolosa, Gipuzkoa) eta Ioritz Iriarte (Lesaka, Nafarroa).
Tolosaldeko Ataria-k txapelketaren bideoa egin du, eta hemen ikus daiteke.