Gure haurrak ere badira ekimenak elkarretaratzeak deituak zituen gaurko Euskal Herriko ikastetxe eta ikastola guztietan, eta Azpeitiko Izarraizpe ikastola publikoko hainbat irakasle izan dira deialdiarekin bat egin dutenak. Izarraizpe Palestinarekin zioen pankartaren atzean bildu dira gaur goizean, Perdillegi kaleko eraikinetako bateko frontoian; berez Artzubiko biribilgunean elkartzekoak ziren, baina azkenean, eguraldia tarteko, mobilizazioa aterpean egitea erabaki dute.
Dena dena, adierazi duten moduan, garrantzitsuena ez da bilkura non egin duten, zergatik egin duten baizik. "Irakasle garen aldetik, eta beraz, gure ikasleen eredu eta erreferente garen heinean, ezin dugu isilik egon genozidio baten aurrean. Elkartasuna, bakea eta konpromisoa hezkuntzaren parte ere badira".