Azpeitiko Udalak eta Bertan merkatari elkarteak Azpeitia zaindu bonu kanpaina jarri dute martxan beste urte batez. Aurten, ordea, badu berritasun bat egitasmoak: kanpaina azarora atzeratu dute. KidS&Us hizkuntza eskolako Maite Etxanizek eta Odriozola farmaziako Cristina Odriozolak kanpainaren xehetasunez hitz egin dute.
Aurten ohi baino beranduago hasiko da kanpaina. Zergatik erabaki duzue azarora atzeratzea?
Maite Etxaniz: Aurten zerbait desberdina egin nahi izan dugu. Kanpaina maiatzean beharrean, azaroan egitea erabaki dugu, herritarrei ezustekoa emateko eta horiek erosteko pizgarria izan dezaten.
Cristina Odriozola: Bai, ideia da herritarrek kanpainaren berri izatea eta aukera aprobetxatzea. Gabonak gerturatu ahala, opariak eta bestelako erosketak egiten hasten gara, eta bonuei esker, aurten lehenago izango dute herritarrek horretarako aukera. Merkatarientzat ere lagungarria da.
Zer eragin du horrelako kanpaina batek herriko saltokietan?
C.O.: Laguntza handia da. Gaur egun, erronka ugari ditu merkataritza txikiak, eta horrelako egitasmoek herritarrak bertako saltokietara erakartzen laguntzen dute. Azken batean, herrian erosita, herriko ekonomia sustatzen dute herritarrek, eta hori denon mesederako da.
M.E.: Horixe da gakoa. Askotan ez gara ohartzen gure erosketa ohiturek duten eraginaz. Herriko saltokietan erosteak, ekonomia sustatzeaz gain, bizia ematen die kaleei. Bonuek, gainera, erosteko laguntza eskaintzen diete herritarrei, eta hori beti da onuragarria.
"Herriko saltokietan erosteak, ekonomia sustatzeaz gain, bizia ematen die kaleei"
Aurten 4.000 bonu aterako dituzue, aurreko edizioko formula errepikatuz. Kopuru hori nahikoa izango dela uste al duzue?
M.E.: Kopuru polita da, herritar askorengana iristeko aukera emango du. Gure nahia da kanpainan ahalik eta jende gehienak parte hartzea eta herritarrek bonuak erabiltzea. Horretarako, aurten ere bonuak aurrez aurre erosteko aukera egongo da, baita Internet bidez ere. Gaur, 16:00etatik 19:30era, eta bihar, 09:30etik 13:30era eta 15:00etatik 16:30era jarriko ditugu bonuak salgai Azoka Plazan, eta online, ordutegi berean eskuratu ahal izango dira, azpeitiazaindu.eus helbidean.
C.O.: Garrantzitsuena herritarrek egitasmoa ezagutzea eta hori aprobetxatzea da. Izan ere, 50 euroko balioa duen bonua 35 euroren trukean eskuratu ahal izango dute. Beraz, erosketak egiteko laguntza zuzena da bonua, eta, aldi berean, diru hori herriko establezimenduetan geratuko da.
Bonu kanpainarekin, udalak herriko merkataritzaren aldeko apustu zuzena egiten du, ezta?
M.E.: Erabat. Udalak 60.000 euro bideratuko ditu bonu kanpainara, eta herritarren ekarpenak gehituta, ia 200.000 euroko eragin ekonomiko zuzena izango du herriko merkataritzan.
C.O.: Gainera, herriko gazteei zuzendutako kontzientziazio kanpaina berezia egingo dugu berriro. Aurten 18 urte betetzen dituzten herritar guztiei (2008an jaiotakoei) hamabost euroko bonua oparituko zaie, bonuak erosi beharrik izan gabe. Horren bidez, gazteak tokiko merkataritzara hurbildu nahi ditugu, bertako produktuak bertako saltokietan kontsumitu ditzaten eta tokiko merkataritzaren zein herritarren arteko loturak sendotu daitezen.
Zer gonbidapen egin nahi diezue herritarrei?
C.O.: Azaroaren 5etik aurrera bonuak eskuratzeko aukera izango dute, eta horiek aprobetxatzera animatuko nituzke. Izan ere, Gabonetako erosketak aurreratzeko edo eguneroko erosketetarako aukera ona dira bonuak. Eta, batez ere, herriko saltokien alde egiteko modu bat dira.
M.E.: Herritarrak animatu nahi ditugu kalera ateratzera, herriko dendak ezagutzera eta bertan erostera. Kanpaina ez da deskontua soilik; herriko merkataritza bizirik mantentzeko modu bat ere bada. Azken batean, herritarrok eta bertako saltokiok egiten dugu herria.
Beraz, aurten Gabonetako erosketak lehenago egitera animatu nahi dituzue herritarrak.
M.E.: Hori da! Aurten ez dugu abendura arte itxaron beharrik izango. Izan ere, azaroan hasiko dugu kanpaina, Gabonetako erosketak lasaiago egiteko aukera eskaintzeko.
C.O.: Eta gogoratu: herrian erosteak herria bizirik mantentzen laguntzen du. Beraz, Azpeitia zaindu kanpainarekin bat egitera animatzen ditugu herritarrak.