Azaroaren 25aren bueltako deialdiak egin dituzte Urola Erdiko Itaiak eta Azpeitiko Feministen Sareak

Andoni Elduaien

Azpeitiko Feministen Sareak epaitegiaren aurrean egin zuen iaz protesta ekitaldia. (Aitziber Arzallus)

Urola Erdiko Itaiak eta Azpeitiko Feministen Sareak protesta ekitaldi bana egingo dute Azaroaren 25ean, herriko plazan. 18:30ean hasiko da Azpeitiko Feministen Sareak deitutako elkarretaratzea, eta 19:00etan emakumeen antolakunde sozialistaren mobilizazioa. 

Indarkeria Matxistaren Kontrako Nazioarteko Eguna izango da azaroaren 25a, asteazkena, eta Urola Erdiko Itaiak eta Azpeitiko Feministen Sareak prest dituzte egun horren bueltan antolatu dituzten ekintzak. Urola Erdiko Itaiak, esaterako, hiru hitzordu antolatu ditu datozen egunetarako. Datorren ostiralean zabalduko dute egitaraua haiek, Basazabal jauregian eskainiko duten Etxebizitza, emakumeon aurkako indarkeria espazioa izeneko hitzaldiarekin. 18:00etan hasiko da solasaldia. 

Zapatuan, berriz, Azaroaren 25erako prestaketak lanak egingo dituzte, Azoka Plazan. "Lan eguna" izendatu dute emakumeen antolakunde sozialistakoek datorren larunbata, eta 11:00etatik aurrera, Indarkeria Matxistaren Kontrako Nazioarteko Egunaren bueltako lanketa gauzatuko dute. Azaroaren 25an, Indarkeria Matxistaren Kontrako Nazioarteko Egunean, egingo duten mobilizazioarekin itxiko dute egitaraua. Herriko plazatik abiatuta, Indarkeria matxistaren aurka borrokatu lelopean egingo dute manifestazioa (19:00). 

Azpeitiko Feministen Sareak, bestalde, elkarretaratzea egingo du azaroaren 25ean, Ez ginen atzera egiteko jaio lelopean (18:30). Plazan egingo duten protesta ekitaldiarekin bat egiteko deia luzatu diete haiek herritarrei: "Ez dugu atzera egingo eta ez gara isilduko! Faxismoaren, matxismoaren eta emakumeon* eskubideak zalantzan jartzen dituzten diskurtsoen aurrean, kaleak hartuko ditugu. Indarkeria matxistaren aurpegiak eta ondorioak salatzeko, faxismoaren aurkako estrategia onena feminismoa delako, denok kalera!".

Gaurko ametsak biharko albiste izan daitezen, beharrezkoa dugu zure babesa.


Egin bazkide