Joan den asteburuan Arrasaten (Gipuzkoa) jokatu zen Enduro Txapelketan parte hartu zuen Arauntza Riders taldeak, eta emaitza bikainak lortu zituzten taldeko txirrindulariek. Larra-Belaguan ekipazio berriarekin egindako estreinaldi arrakastatsuaren ondoren, sasoi onean daudela berretsi zuten Arrasateko proban ere.
Taldeko ordezkarien artean, Naroa Aranbarri azpeitiarra izan zen protagonista nagusietako bat, E-bike emakumezkoen kategorian garaipena eskuratuta. Endika Itxuño markiñarrak (Bizkaia) ere lehen postua lortu zuen Master 40 kategorian, eta Danel Mugarza oñatiarrak (Gipuzkoa) gauza bera egin zuen Sub-18 mailan.
Elite kategorian, Ekhi Munduate alegiarrak (Gipuzkoa) bigarren postua eskuratu zuen lehia estu baten ondoren. Bestalde, Pello Lazkoz gasteiztarrak hirugarren amaitu zuen E-bike gizonezkoen kategorian, taldearen podium uzta oparoa borobilduz.
Arrasateko mendi eta bidezidorretan jokatutako probak maila handiko lehia eskaini zuen beste behin ere, eta Arauntza Riders taldeko kideek bikain erantzun zuten erronka berriaren aurrean. Emaitza hauek azken asteetan erakusten ari den lanaren eta konpromisoaren isla dira, eta denboraldiko hurrengo hitzorduei begira motibazioz beterik jarraitzen dute.
Amaitzeko, eskerrak eman gure babesle eta laguntzaile guztiei. Haien laguntzarik gabe ezinezkoa izango litzateke Arauntza Riders proiektua aurrera eramatea. Era berean, taldetik animo eta besarkada handi bat bidali nahi diogu Mikel Bergarari, lasterketan izandako erorikoaren ondoren. Espero dugu laster osatzea eta ahalik eta azkarren bizikletaren gainean berriro ikustea.
