Ikasle-antolakundea duela 37 urte sortu zen toki berean, 500 militante eta 200 militante ohi elkartu gara Ikasle Abertzaleaken VIII. Kongresuari amaiera emateko. VIII. Kongresu honetan, VII. Kongresuan Errainu ponentziaren eskutik hartutako estrategia komunistaren bidea berretsi dugu. Zentzu horretan, Euskal Herriko Mugimendu Sozialistaren baitan aritzea eta antolakundearen izena eguneratzea erabaki dugu antolakundea osatzen dugun ehunka militanteok, erabateko adostasunez.
Hemendik aurrera, Euskal Herriko Ikasle Antolakunde Sozialista (IAS) gisa jarraituko dugu lanean. Izen berri honekin, batetik, gure izaera sozialista-iraultzailea nabarmendu nahi izan dugu, eta bestetik, azpimarratu dugu gure jardun-eremua Euskal Herria dela, zeinetan nazio-zapalkuntzari aurre egitea eta hura deuseztatzea lehentasunezkoa den oraindik ere.
Guretzat aurrerapauso bat da VIII. Kongresu hau, izan ere, aurreko belaunaldien lekukoa hartu eta beraien ibilbideak utzitako irakaspenetatik proposamen estrategiko eta organizatiboa gaurkotu eta garatu dugu.
Ikasle langileon interesak babestuko dituen ikasle-antolakundea izan nahi du IASek, eta zentzu horretan, hezkuntza-sistema sozialistaren aldeko hautua egiten dugu helburu estrategiko bezala. Euskal Herriko langileriaren borroka historikoa berretsi eta geure egiten dugu, eta autodeterminazioa eta Euskal Estatu Sozialista aldarrikatzen ditugu. Horrez gain, faxismoaren aurkako eragile aktiboa izan nahi dugu; faxismoari hezkuntzan eta ikasleon artean hedatzen utziko ez dion eragile aktibo bat.
Eztabaidaz eta formakuntzaz betetako hilabete luzeen ondoren, prest gaude prozesu sozialistan beste urrats bat emateko, VII. Kongresuan ehunka militantek egin bezala, orain gure eginkizuna baita aurrera egitea. Indarrez eta ilusioz beteta ekingo diogu etapa berriari; beti bezain iraultzaile, beti bezain borrokalari.