Bertan merkatari elkarteak Soldatakaie kanpaina jarri du martxan gaur, astelehenez, Azpeitiko tokiko merkataritza sustatzeko eta herritarrak herriko dendetan erostera animatzeko helburuarekin.
Kanpainak herritarren artean ezaguna den ideia bat hartu du abiapuntu gisa: Nescaféren soldata ospetsuaren antzera, sariak hilez hil banatuko den 'soldata' baten forma izango du. Kasu honetan, ordea, ekimena tokiko merkataritzara egokituta dago: irabazleak 300 euro jasoko ditu hilero, sei hilabetez jarraian, Bertan elkarteko establezimenduetan gastatzeko. Beraz, guztira, 1.800 euroko erosketa bonua izango da jokoan.
Ekainaren 15etik 28ra bitartean kanpainara batu diren Azpeitiko establezimenduetan erosketak egiten dituzten bezeroek zozketan parte hartzeko aukera izango dute. Erosketa bakoitzeko boleto bat jasoko dute, eta hori beren datuekin bete eta saltokian utzi beharko dute.
Kanpainaren helburua bezeroak saritzea da, baina baita kontsumoa herrian bertan mantentzea ere. Egitasmoak tokiko negozioen jarduera indartu nahi du, herriko merkataritza sareari ikusgarritasuna emanez eta herritarren zein saltokien arteko harremana sendotuz. Ekimenari ikusgarritasuna emateko, parte hartzen duten saltokiek banderolak izango dituzte erakusleihoetan. Horri esker, herritarrek erraz identifikatu ahal izango dituzte kanpainan parte hartzen duten establezimenduak.
Bertan elkarteak herritarrak animatu nahi ditu datozen egunetan Azpeitiko dendetan erosketak egitera eta kanpainan parte hartzera. Izan ere, horrelako egitasmoek tokiko merkataritza dinamizatzen laguntzen dute, eta herriko kontsumo ohiturak bertako establezimenduetara bideratzeko tresna eraginkorrak dira.