Bizitzaren bidea ametsek eraikitzen dutela esan ohi da, eta ametsa egi bihurtzeko puntuan egon da Zurt Taberna ISB. Leioan jokatutako Lauko Finalean, LF2ra igotzeko Espainiako Fasera pasatzeko bidegurutzean gelditu ziren Joseba Lizarralderen neskak, finalerdietan garaipena lortu eta finalean Donosti Basket Bera Berari gauzak oso zail jarri eta gero. Egia esan, denboraldia txapela kentzeko modukoa izan da, hamaika partida jarraian irabazita, egun askotan lider mantenduz, fase erregularra laugarren amaituta eta, batez ere, emakumezkoen saskibaloia berriz ere denen ahotan jarrita Urolako bailaran. Horregatik, neska borrokalari hauek zoriontzea besterik ez da gelditzen.
Larunbatean Atletico San Sebastian Tecnum, hirugarren sailkatuaren aurka jokatu behar izan zuen Zurt Taberna ISBk finalerdia. Tentsio handiko partida izan zen, jokoan zegoena ez baitzen edozer, baina ISBko neskek partidan zehar erakutsi zuten, donostiarrei eskua hartuta dietela. Sailkapenean beraien atzean gelditu izanagatik, badakite nola jokatu Atleticoren aurka Joseba Lizarralderenek eta barruan jaso zezaketen minari, abiadurarekin erantzun zioten. Defentsan oldarkor agertuz, baloiak berreskuratzeko gai izan ziren eta horrek eraman zituen markagailuan une oro agintzen ibiltzera. Aldeak ez ziren handiak eta Donostiako taldeak asko estutu zituen, baina azken minutuetan kolpe erabakigarria ematen jakin izan zuen Zurtek eta azkenerako 54 eta 65 irabazita lortu zuen finalerako txartela.
Partzialak: 14-18,17-14,11-13,12-20
Zurt taberna ISB: Garazi (5), Eider Iturralde, Sara, Irati (4), Maite Zubizarreta (13), Intza Lizarazu (14), Berezi (2), Maite Lizarazu (13), Maitane, Itsaso (7), Ane Goenaga (2), Naroa (5).
Igandean ametsarekin jarraitzeko gogoz gerturatu ziren Leioara finala jokatzera Iraurgi SBko neskak. Aurreko eguneko esfortzuarekin nekatuta eta neurketa oso zail baten aurrean zeudela jakinda, baina ilusioz beterik. Hala ere, partidak zor zezakeen presioak jota edo, ez zuten hasierako minutuetan euren jokorik onena erakutsi, batez ere, defentsako lanean, Donostiko taldeak behin eta berriz sekulako mina egin baitzien kanpoko jaurtiketekin. Bigarren laurdenetik aurrera defentsako arazo horiek zuzentzen hasi ziren, baina atzeko arazoak desagertzen hastearekin bat erasokoak agertzen hasi ziren eta atsedenaldira 13 puntu azpitik heldu ziren. Bazirudien Donosti Basket gutxika-gutxika partida poltsikoratzen zebilela, gehiago kontutan hartuta hirugarren laurdena hasi eta berehala 18 puntu aurretik jarri zirela. Baina, Zurtek bere ezaugarri nagusia borrokarako gogoa dela erakutsi zuen beste behin denboraldi honetan, eta errazena besoak jaitsi eta neurketa lehenbailehen amaitzeko itxarotea zenean, 6 eta 17ko partziala egin eta oraindik dena erabakitzeke zegoela erakutsi zuten. 5 puntura jartzea ere lortu zuten, baina azken erasoetan ez zuten asmatu eta azkenean, harro egoteko moduko neurketa, 59 eta 50 galdu zuten.
Partzialak: 16-11,18-10,11-17,14-12
ZURT TABERNA ISB: Garazi (5), Eider Iturralde, Sara, Irati, Maite Zubizarreta (12), Intza Lizarazu (4), Berezi (10), Maite Lizarazu (4), Maitane, Itsaso (12),
Ane Goenaga, Naroa (3).
Ametsa guztiz gauzatu gabe bueltatu ziren etxera Joseba Lizarralderenak, baina pausoak gutxika-gutxika eman behar dira ziurragoak izateko, eta talde honen hazkundean, datorren denboraldiari begira ere eman beharreko pausuak gorde behar dira.
Zorionak neskak!