Ohiko bihurtzen hasi da dagoeneko Sammic ISBko jokalariren bat asteko bostekoan ikustea. Normalean Marcius eta Semple ikusi izan ditugu eta aste honetan ere horrela gertatu da, 11. jardunaldiko bostekoan sartu baitute Jordan Semple. Ez da harritzekoa, Obila liderraren aurka egundoko partida jokatu zuelako Iraurgi SBko amerikarrak. 18 puntu sartu (10/8 jaurtiketetan), 9 errebote eskuratu, 6 asistentzia banatu, 2 baloi berreskuratu, txapel bat jarri eta 2 falta jasota, 30eko balorazioarekin amaitu zuen. Jardunaldiko bigarren jokalari baloratuena izan da honenbestez, eta horregatik sartu dute bostekoan hegal-pibot onena bezala.
Jordan Semple Zilarrezko LEB ligako bosgarren jokalari baloratuena da, Marcius taldekidearen atzetik, 18’27ko bataz besteko balorazioarekin. 14 puntutik gora sartzen ditu partidako, bosgarren erreboteatzaile nagusiena da 8’9 eskuratuta bataz beste, eta ia 3 asistentzia banatzen ditu partidako. Sekulako zenbakiak.
Zorionak, Jordan!