Kilometroak: periferian ere, euskararen haziak ereiten!

Azpeitiko ordezkariak Beskoitzeko ikastolakoekin, igandeko ekitaldian. (Kilometroak 2024)

Kilometroetako eta Azpeitiko ikastolako ordezkariak Beskoitzeko ikastolan izan dira, Ikastolak Herriari egitasmoaren barruan, Non eta Mugan ekitaldian.

Herenegun, martxoaren 10ean, Kilometroetako eta Azpeitiko ikastolako ordezkariak Beskoitzeko (Lapurdin) ikastolan izan ziren, Ikastolak Herriari egitasmoaren barruan, Non eta Mugan ekitaldian parte hartzeko.

Ekitaldi horren bidez, Euskal Herriko Ikastolen Federazioak aitortza egin nahi izan die Euskal Herriko periferian dauden zortzi ikastolei, euskal kultura inguru horietan bultzatzeko egiten duten lan itzelagatik.

Gogoan izan behar da, gainera, Beskoitzen egoera bereziki larria pairatzen ari direla, ikastolak bere jarduerarekin jarraitzeko baimena kentzeko mehatxuaz gain, ikastolako ikasleek prefabrikatuetan jasotzen baitituzte klaseak.

Hori dela eta, Kilometroen logoa izango den eguzki-lorearen eskuz eginiko oroigarria eman zaie Beskoitzeko ikastolako arduradunei, bertan ere euskararen haziak aterako diren itxaropena bizirik mantentzeko.

Azpeitia Gukak zu bezalako irakurleen babesa behar du tokiko informazioa euskaraz eta modu profesionalean lantzen jarraitzeko.


Izan Gukakide