Asteazkeneko greba orokorraren harira, Urola Erdiko Kontseilu Sozialistak errepidea moztu zuen ordu laurdenez, Sanjuandegiko biribilgunearen parean. Momentu hori baliatu zuten hainbat lagunek autoz auto joateko eta ingurutik pasa zen orori eskuorriak banatzeko.
Modu horretan, grebako aldarri nagusiak zabaldu zituzten, greba egunaren atarian: espekulatzaileak espropiatzea, espekulazioa debekatzea eta etxebizitza langile klasearen beharren arabera planifikatzea eskatu zuten. Greba orokorra gerturatzen ari den honetan, giroa sortzea eta egoera desnormalizatzea ere izan zen helburua, baita herritar orori grebara eta eguneko mobilizazioetara zein ekintzetara batzeko deia egitea ere.
