Oraingo honetan zirkua izan da Sorginorratzak egitasmoko protagonista. Urriaren 29tik azaroak 19ra, astean behin, ordubeteko lau saio eskaini dizkiote hainbat gaztetxok diziplina horri. Ekain Ibarguren izan dute bidelagun, Gure Zirkua proiektuko pailazoa bera eta malabarista.
Lehenengo saioetan, ogibidearen alderdi ezberdinak azaldu zizkien Ibargurenek gaztetxoei, baita entrenatzearen garrantziaz hitz egin ere. Horrekin batera, karparen muntatze eta desmuntatze lana nola egiten den ikasi zuten: zein den materiala, zenbat jende aritzen den lanean, zeintzuk diren karpa bat zutitzeko eta desegiteko jarraitu beharreko pausoak... Finean, distira, fokua eta ikusgarria den horren atzean dagoenaz aritu ziren.
Gorputzetik sortzeko momentua ere iritsi zen, zirkuaren diziplina ezberdinak praktikan jartzeko unea. Malgutasuna eta oreka ona izatea ezinbestekoa da zirkuan aritzeko, eta horregatik, gorputza mugitu eta lantzeko hainbat jolas egin zituzten gaztetxoek. Une batez, etorkizuneko trapezistak, funanbulistak, malabaristak eta pailazoak ikusi ahal izan ziren Dinamoa sormen gunean.
Zirku tailerreko azken saioa izan zen dibertigarriena, ikasitako guztia gurasoekin batera praktikan jarri behar izan baitzuten partaideek. Haurrak zein gurasoak, banaka, binaka eta taldean aritu ziren; besteak beste, malabareak, sokasaltoa eta akroyoga egin zituzten. Une batez, Dinamoa sormen gunea benetako zirku bihurtu zen. Honako lotura honetan ikus daitezke zirku tailerreko irudiak.
Behin gorputzaren eremuko saioak amaituta, soinuaren munduan murgilduko dira gaztetxoak Sorginorratzaki esker. Asteazkenean, Elba Azpillaga Bulego taldeko teklistak Izan DJ tailerrari emango dio hasiera. Azaroak 26tik abenduak 17ra, asteazkenero eskainiko du tailerra Dinamoa sormen gunean.
Sorginorratzak egitasmoaren bidez, eta kultur sormen praktikekin, gazteengana iritsi nahi du Kulturaz kooperatibak, ikastetxeetan eskaintzen zaien hezkuntza eskaintza osatzeko eta aberasteko. Proiektuaren inguruko xehetasun guztiak hemen aurki daitezke.