Legazpiko (Gipuzkoa) Santikutz txirrindularitza klasikoak 90 aldi bete dituela eta, erakusketa jarri du herri hartako Kultur Etxean Sebastian Santestebanek, edizio guztietako informazioarekin osatuta.
Joan den zapatuan ireki zuten erakusketa hori, eta gizonen afizionatu mailako lasterketa ezaguna irabazi duten hainbat txirrindulari gonbidatu zituzten irekiera ekitaldira. Han, irabazle izandako bakoitzari koadro bat eman zioten oroigarri, irabazi zuen urtearekin, orduko prentsako aipamenekin eta argazkiekin.
Inazio Aizpuru Errekalde izan zen oroigarria jaso zutenetako bat; izan ere, 1971eko lasterketa irabazi zuen Nuarben bizi den urrestildarrak.
Goierriko Hitza-n jaso dituzte erakusketaren inaugurazio ekitaldiaren gaineko guztiak.