Joan den asteburuan Gipuzkoako eskuzko hiru final jokatu dituzte Ilunpeko pilotari gazteek, bat Amasan eta bi Azpeitiko Frontoi Txikian.
Larunbat arratsaldean Azpeitiko Frontoi Txikian bi final jokatu zituzten. Infantilen lehen mailakoen Ilunpeko Iraitz Arsuaga eta Aiurdi Peñagarikano izan ziren nagusi, Oiarpeko Aiur Apezetxeari eta Oaitz Erauntzetamurgili 18 eta 17 irabazita.
Kimuen lehen mailako finala tanto bakar baten aldearekin (15 eta 16) galdu zuten Ilunpeko Amets Garitaonandiak eta Janitz Goenagak Intxurreko Xuban Altunaren eta Aitor Mujikaren kontra.
Eskuzko Berezkoen Gipuzkoako Txapelketa-Elay Saria pilota txapelketako kimuen mailako finala ere jokatu zuen larunbat arratsaldean, Amasan, Ilunpeko Xuban Arandiak Ataungo Aretz Aldasororen kontra. Arandiak 1 eta 16 eginda finala galdu egin zuen.
Xuban Arandia izan da txapeldunordea Berezkoen Banakako Txapelketan. (Ilunpe)