Udaberriko Mendi Asteko joan den astearteko eta asteazkeneko ekitaldietara ehun lagunetik gora bertaratu ziren Soreasu antzokira. Lehenengo eguneko saioan, Mendi Tour jaialdiko hainbat film ikusteko aukera egon zen, eta bigarrengo egunean, berriz, Isiltasunetik ikus-entzunezko hunkigarriaren emanaldia eta solasaldia izan zen.
Ostegunean, Mendi Astearen agertokia aldatu, eta Mendietxen Mikel Agirre eta Eneko Iglesias himalayista azpeitiarren bizipenak ezagutzeko aukera izan zen. Aretoa goraino bete zen, herriko mendizaleen bizipenek sekulako interesa piztuta. Poz ematen du etxeko jendea Ama Dablamekoa bezain jarduera interesgarriak gauzatzen ikusteak, eta pozgarria izan da herritarrek emandako erantzuna era honetako emanaldi bati.
Bukatzeko, Lagun Onak MBren izenean, eskerrak eman nahi dizkiegu egitasmo honetan bidelagun izan ditugun eragileei, bereziki Azpeitiko Udalari, Kulturaz kooperatibari eta Mendietxe museoari. Eskerrak baita ere emanaldiak eskaini eta aurkeztu dituzten lagunei, eta nola ez, ekintzetara joan diren pertsona guztiei. Zuek gabe honek ez luke inolako zentzurik, beraz, eskerrik asko bihotzez!
Udazkenean ikusiko dugu berriro elkar!