Azpeitiko Ikastola Ikasberrik antolatuta eta Izpiz izpi leloarekin, 2024ko Kilometroak egingo dituzte gaur herrian. Aurtengoa da Azpeitiak Gipuzkoako ikastolen festa hartuko duen laugarren aldia, 1979., 2000. eta 2011. urteetakoak ere bertan egin baitzituzten.
Hain zuzen ere, bihar, urriaren 7an, beteko dira 45 urte Azpeitian estreinakoz Kilometroak ospatu zirenetik. 1979ko urriaren 7 hartako irudiak, argazkiak zein bideoak, bolo-bolo dabiltza egunotan webgune honetan, benetako altxor bihurtuta. Urriko Zaharrak berri honetarako aukeratutako irudia ere urte hartako edizioak utzitako perletako bat da: guraso-antolatzaileak arto soroaren ertzean, urte hartarako ateratako elastikoak soinean eta eguzkitik babesteko egunkariekin egindako kapelak buruan, lana eta umore ona partekatuz.
Aurtengoak ere utziko ditu, seguru asko, hamarkada batzuk barru altxor bilakatuko diren irudiak.