Iazkoa bezala, 2012koa ere uda oparoa izan da Pablo Etxeberria igerilari gaztearentzat. Izarraitz Igeri Elkarteko 15 urteko kirolariak Distantzia Luzeko Gipuzkoako XXII. Liga irabazi du aurten ere, baina oraingoan senior mailan. Aurten lehiatu da lehen aldiz maila gorenean Etxeberria eta estreinaldia ezin hobea izan da beretzat, 2011n infantil mailan lortu zuen garaipena errepikatu baitu.
Distantzia luzeko liga udan eta itsasoan jokatzen dute igerilariek. Guztira sei lasterketak osatzen dute egutegia. Aurrena uztailaren 29an jokatu zuten Getaria eta Zarautz artean. Azkena, berriz, joan den zapatuan, irailak 8, Donostiako Kontxako badian. 2.200 metroko distantzia bete behar zuten igerilariek eta Etxeberriak sailkapen orokorrean bosgarren tokia eta senior mailan hirugarrena eskuratu zituen azken lasterketa horretan. Hor batutako puntuei esker, gainera, ligako sailkapen nagusia poltsikoratu zuen.
Infantilak ere txukun
Etxeberriaz gain Izarraitz Igeri Elkarteko beste hiru ordezkarik ere hartu zuten parte Kontxako proban, hiruak infantil mailan. Mutiletan, Jon Aizpuru laugarren postuan sailkatu zen eta Joanes Astigarraga berrogeigarren; nesketan, berriz, Maialen Aizpuru hamaikagarrena izan zen.
Infantilen ligako sailkapenean, Jon Aizpuru laugarrena izan da azkenean.