Gipuzkoako Herriarteko txapelketa irabazi du gaur, igandea, Azpeitiak Tolosari 3 eta 0 irabazi ostean. Donostiako Atano III. pilotalekuan azpeitiar ugari izan dira partidak ikusten, eta arratsaldean ere herritarren harrera beroa jaso dute azpeitiar pilotariek eta Ilunpe elkarteko kideek. 19:30ean Perez Arregi plazatxotik abiatu dute kalejira pilotariek, elkarteko kideek eta udal ordezkariek, musika banda lagun zutela. Erdikalea jendez lepo zegoen, haiei harrera egiteko. Plazan ere herritar ugari zuten zain, eta txaloz hartu dituzte pilotariak. Pilotariak udaletxeko balkoira atera direnean 'Ilunpe' eta 'Azpeiti' oihukatu dituzte zaleek.