Saninazioetako zezenketetako azkena, abuztuaren 2koa, telebistaz emango du Canal Plus kateak. Hala jakinarazi du Aplausos zezenketa astekariak. Egun horretan Javier Castaño, Juan del Alamo eta Lopez Simon toreatzaileak Pedraza de Yeltes (Salamanca, Espainia) ganadutegiko zezenekin arituko dira.
Saninazioetako beste bi zezenketak uztailaren 31n eta abuztuaren 1ean izango dira. Uztailaren 31n Celestino Cuadri (Huelva, Andaluzia, Espainia) ganadutegiko zezenekin arituko dira Paulita, Sergio Serrano eta Perez Mota toreatzaileak. Abuztuaren 1eko zezenketan, berriz, Juan Bautista, Manuel Escribano eta Arturo Macias toreatzaileak arituko dira eta Ana Romero (Cadiz, Andaluzia, Espainia) ganadutegiko zezenak toreatuko dituzte.