Arah musika taldeak Bazen behin izeneko ganbera musika emanaldia eskainiko du datorren igandean, Soreasu antzokian. 18:00etan hasiko da saioa, eta sarrerak Kulturaz.eus atarian eskura daitezke, hamar euroren trukean. Izatez, taldea irailean zen emanaldia eskaintzekoa, baina taldekide bat gaixorik zela eta, bertan behera gelditu zen kontzertua orduko hartan.
Euskal kultura josi duten musika obren moldaketak dira emanaldiaren muina. Arah taldeko kideen arabera, tradizioaren elementuak abiapuntu harturik, dantza garaikidearekin eta perkusioarekin fusionatzen da ikuskizuna. "Antzinako kontakizunak eguneratzeari egiten dio erreferentzia Bazen behin-ek. Adierazpen berrien sorkuntzarako elezaharrak norberarengan nola iragazten diren kontuan izanik, mintzamen anitzen aberastasunari ipini nahi dio argia, garaikidetasunari leku bat eskainiz, baina sustraiekiko begirada arduratsua mantenduz".