10.000 izen agertu dira gaur goizean Tourreko lehen esprinta irabazteko hautagai. Batzuk aipatuko zuten Biniam Girmayren izena, baina gehienek ez, Eritreakoa baino izen handiagoa duten dozena bat hautagai tartean zirelako. Tourra, baina, handia da begiratzen zaion tokitik begiratuta, eta denek nahi dute garaipena. Horrek urduritasuna eragin du, eta erorikoak. Mathieu Van der Poel munduko txapelduna eta Jasper Philippsen bere taldekidea geratu dira jokoz kanpo sei eta bi kilometroren faltan gertatu diren bi erorikoetan. Faborito nagusia zen Philippsen, eta ez da sartu esprintean.
Trenorik ere ez da egon, Girmayren Intermarche taldea izan bada ere etxeko lanak ondoen egin dituen taldea. Azken kilometro erdian, baina, norberak atera behar izan ditu babak eltzetik, eta lan horretan Girmay izan da onena, Gaviria eta De Lieri aurrea hartuta. Belgikarra ez da urruti ibili, baina podiumeko hirugarren koskarekin konformatu behar izan du. Bost kilometroko segurtasun langa berriari esker oilarrek lasai egin dute bidea azken 5.000 metroetan, eta postumetroaren baitan, Richard Carapaz izan da azkarrena, maillot horia bereganatzeko.
Kirol justizia izanen da agian, bart Tadej Pogacar maillot horirik ez zutela nahi aitortzen grabatu baitzuten kamerek, Evenepoelekin eduki zuen elkarrizketan. Bolognako helmugan lasai helmugaratu zen esloveniarra, atzo, segundotxo bat galdu eta maillot horia ez hartzeko. Gaurkoan ere garbi geratu da maillot horiaren kargarik ez duela nahi momentuz UAEk. Gustura hartuko du Carapaz ekuatoriarrak, noiz eta Olinpiar Jokoen atarian bere herriko kirol arduradunek lehiaketatik kanpo utzi dutenean, Jhonatan Narvaezen mesedetan. Jarduneko olinpiar txapelduna izanda!
Bihar laugarren etapa, Pinerolo-Valloire: Italian hasi eta Frantzian bukatu. 140 kilometro baino ez, baina Galibier erraldoia tartean. Broma gutxi, alde errazenetik igotzen bada ere. Gainetik 16 kilometro baino ez dira geratuko helmugara, eta jaitsiera teknikoa da. Tom Pidcocken jaitsiera ikusgarria errepikatuko ote da bihar?