Bihar, igandea, Lagun Onak txirrindulari elkarteak antolatutako Inazio Deuna probaren 44. edizioa izango da herrian. Iazko salbuespenaren ostean, betiko datetan eta formatuan egingo dute aurtengoa; izan ere, iaz, bi hilabetez atzeratu eta irailean egin zuten lasterketa, ohi baino ibilbide luzeagoarekin gainera. Biharkoan, kadete mailako txirrindulariak ariko dira lehian, Azpeitian hasi eta bukatuko den proban. Hain zuzen ere, Perez Arregi plazatxoaren ondoan jarriko dute hasiera puntua, eta baita helmuga ere.
16:00etan hasiko da lasterketa, eta txirrindulariak Zestoara, Iraetara eta Arroagoira joango dira, handik berriz ere Azpeitira itzultzeko. Loiola aldera joan ostean, Zestoara bueltatuko dira txirrindulariak, eta handik, Iraeta, Aizarna, Etumeta eta Benta Berri igarota, Azpeitira joango dira. Ordu eta erdi inguruko lasterketa izango da, 58 kilometrokoa.