Gabonetarako programazio berezia prestatu dute Azpeitiko Ekoetxean urtarrilaren 5era bitartean, "Gabonetako espiritu iraunkorra sustatzeko nahiz jaietan ohitura iraunkorragoak bultzatzeko tresnak eta ezagutzak eskaintzeko" helburuarekin. Hala, modu ludikoan hainbat pista eta erronka joko egiteko aukera izango dute egunotan Ekoetxera joaten diren familiek, eta opariak trukatzeko txoko bat ere jarri dute bigarren urtez: Trukegunea.
Ikasiz ondo pasatzeko hainbat esperientzia eskainiko dituzte Ekoetxean egun eta ordu jakinetan. Horietako bi honakoak dira: Bata, Terminus: klima-aldaketaren escape-boxa izenekoa da. Ekintza desberdinen bidez hainbat erronka gainditu beharko dituzte parte hartzaileek denbora jakin batean. Joko honetan parte hartzeko egunak honakoak dira: abenduak 22, 23, 26, 27 eta 28 eta urtarrilak 2 eta 3. Ekintzaren hasiera orduak honakoak dira: 11:00etan eta 16:00etan. Bestea, Ekoetxea ezagutzen pista jokoa izeneko ekintza da. Ordu eta erdiko iraupena duen jolasa da, eta Ekoetxearen barrualdea eta kanpoaldea arakatzera gonbidatzen ditu parte hartzaileak, pistak bilatuz eta galderak erantzunez. Jasangarritasunari eta ingurumenari buruz ikasteko pista jokoa da. Jarduera egiteko aukera honako egunetan eskainiko dute: abenduak 22, 23, 26, 27, 29 eta urtarrilak 2, 3 eta 4. Jarduera hasteko orduak honakoak dira: 11:30ean eta 16:00etan.
Gainera, bakoitzak bere kontu Xaguxatar Bidea: ezkutuko altxorra ibilbidea egiteko aukera izango da, pistak bilatuz eta erronkak gaindituz. Familian gozatzeko ibilbide erraza da . Ibilbidea egiteko Ekoetxean bertan jaso daiteke honako ordutegian: 10:00etatik 13:00etara eta 15:00etatik 17:30era.
Prestatutako ekintzetan parte hartzera deitu dituzte herritarrak Ekoetxeakoek. Informazio gehiago jaso nahi dutenek Azpeitiko Ekoetxera jo dezakete, 943-81 24 48 telefono zenbakira deituta edota info.azpeitia@ekoetxea.eus helbide elektronikora idatzita.