Berrikuntzekin eta jende ugariren parte hartzearekin jokatu dute gaur, urteko azken egunean, Azpeitiko 23. San Silbestre lasterketa. Hiru proba jokatuko dituzte goizean Azpeitiko kaleetan. 11:00etan hasi da lasterketa inklusiboa herriko plazatik, eta 300 metroko ibilbidea izan du. Proba inklusiboan ez da sailkapenik eta izen ematerik egon, eta haurrek nahiz helduek parte hartu dute, elkarrekin. Alde Zaharreko kaleetan barrena egin dute proba, eta urtero bezala, Txolarte, Marea Urdina eta Gautenako kideek ireki dute lasterketa.
Ondoren, lasterketa laburra jokatu dute. 11:30ean hasi da, Azoka Plazaren atzetik, Zelai Luzetik. 12 urtetik gorako gazteei eta helduei zuzendutako proba izan da, eta lehen kilometroa kontrolatuta egin dute. Proba horren helburua da urteari "lagun artean eta giro onean" amaiera ematea. Mutiletan, Jakes Zubizarreta sailkatu da aurrena, Manex Uranga bigarren, eta Aner Korta hirugarren. Nesketan, Maite Arregi izan da lehena, Elene Albarez de Arkaia bigarrena, eta Inge Zubeldia hirugarrena.
Hemen ikus daiteke lasterketa laburreko sailkapena osorik.
Segidan, 12:00etan hasita, jokatu dute helduen lasterketa nagusia. Proba horrek ere ibilbide berria izan du, eta aurtengoan, Zelai Luzen hasi dute lasterketa. Dortsal guztiak agortuta jokatu dute proba hori; izan ere, proba nagusirako salgai jarritako mila dortsalak bost egunetan saldu zituzten antolatzaileek. Hala ere, eskaria kontuan hartuta, beste 50 dortsal jarri zituzten salgai. Beraz, oso jendetsua izan da helduen lasterketa.
Hasieratik lasterketaren buruan jarri da Aitor Mimenza iazko garailea, eta haren atzean kokatu da Amets Aranberri zestoarra. Dena den, helmugara iristerako Aranberrik aurrea hartu dio Mimenzari, eta, beraz, hura gailendu da 23. San Silbestre lasterketan, zortzi segundoko aldeagatik. Emakumeetan, berriz, Jone Zabaleta azkoitiarra izan da azkarrena.
Hona hemen helduen probako sailkapena:
Gizonetan
- 1. Amets Aranberri: 17:44
- 2. Aitor Mimenza: 17:52
- 3. Julen Azpiazu: 18:09
Emakumeetan
- 1. Jone Zabaleta: 22:12
- 2. Ane Arrieta: 22:24
- 3. Maialen Azpiazu: 22:25
Hemen ikus daiteke lasterketa nagusiko sailkapena osorik.
