Atzo Barakaldon izandako hilketa matxistaren aurrean, elkarretaratze bana deitu dute Itaiak eta Azpeitiko Feministen Sariek. Bata, Itaiak antolatutakoa, gaur 19.00etan izango da herriko plazan, Indarkeria matxistari aurre egiteko antolatu gaitezen lelopean. Bestea, Azpeitiko Feministen Sariek deitutakoa, bihar 13:00etan izango da, plazan hori ere, Eraso sexistarik ez! Autodefentsa feminista! lelopean. Barakaldoko hilketa ez ezik, azken egunotan herrian izan diren bi eraso matxistak gaitzesteko ere baliatuko dute bihar eguerdiko mobilizazioa.
Atzo arratsaldean 84 urteko emakume bat hil zuten Barakaldo erdigunean dagoen Arrandi kalean. 16:30ak aldera abisu bat igorri zioten bizilagunek Ertzaintzari, etxebizitza batean emakume bat hilda egon zitekeela esanez, oihuak eta eztabaidak entzuten zirelako. Poliziek, bertaratu zirenean, emakumea hilda zegoela ikusi zuten, eta gorpuak indarkeria zantzuak zituela. Haren semea etxean zen eta atxilo hartu zuten; 60 urte inguru ditu gizonak.
Gaur jakin denez, emakumeak semearen kontra salaketarik ez zuen inoiz jarri; bai, ordea, senarraren kontra. Uneotan semeak atxilotuta jarraitzen du, epailearengana eramateko zain, eta hipotesi nagusia amaren hiltzailea semea dela izan arren, ikerketak zabalik jarraitzen du oraindik ere.
