Erdikaleko 13 eta 15 zenbakidun eraikinak eraisten ari da Azpeitiko Udala, horien etxabeetan Jostaldi denda eta Amaia taberna kokatzen ziren. Azken asteetan eraikinak husten aritu dira langileak, eta egunotan horien hormak eraisten ari dira.
Udal ordezkariek joan zen irailean egin zuten agerraldi bat, udalak bi eraikin horiek erosi zituela esateko. Orduan aurreratu zutenez, eraikinok bota eta babestutako hamabi etxebizitza eraikiko dituzte, "printzipioz, salmentarako". Alde Zaharra biziberritzeko xedez eraikiko dituzte etxebizitza berriak, "herritarrak eremu horretara erakartzeko".
Behin eraikinak botata, etxebizitza berriak eraikitzeko proiektua gauzatuko du erakundeak, eta ondoren, exekutatzera aterako dute. Etxeak eginda eta herritarrentzat erabilgarri izaterako, bi urte eta erdi igaroko direla adierazi zuen joan zen irailean Nagore Alkorta alkateak.