Ibilgailu elektrikoak kargatzeko hamar puntu berri jarriko dituzte herrian, Azpeitiko Udalak eta Ekindarrek sinatutako hitzarmen bati esker. Iaz IDAEren (Energia Aurrezteko eta Dibertsifikatzeko Institutua) diru laguntza jaso zuen energia kooperatibak, eta horren ondorioz jarriko dituzte birkarga puntuak. Kargagailuak puntu bikoitzekoak izango dira, eta 22 Kw eskainiko du hartune bakoitzak.
Dena ondo bidean, ekainaren bukaerarako karga puntu denak jarrita eta martxan izango direla aurreratu du udalak. Honakoak izango dira horien kokapenak: kiroldegiko aparkalekua, udal igerilekua (gaur egungo leku berean), Soreasuko aparkaleku publikoa, Loiolako Inazio Etorbidea 49. zenbakian (edukiontzien eta zebra bidearen artean), Alberdieneako aparkaleku publikoa, San Martin estrata (Helduen Hezkuntza zentroaren aurrean), Loiolako Ignazio Etorbidea 79. zenbakian (Zuar kafetegiaren parean), Loiola (tren geltoki zaharraren ondoan), Euskal Herria auzoa 33. zenbakian eta Urrestilla erdiguneko aparkalekuan.
Salbekoa ez da erabilgarri
Udalak azaldu duenez, Salbe auzoan egitekoak diren berrurbanizazio lanak direla eta, eremu horretako birkarga puntua –igerilekuaren eraikinaren aurrekoa– dagoeneko ez dago martxan, eta datorren astearen hasieran kendu ere egingo dute leku horretatik. Birkarga puntu hori lehengoratu eta berriak jarri bitartean, Azoka Plaza ondoko puntua erabili ahal izango dute herritarrek ibilgailu elektrikoak kargatzeko.
Dena den, udalak eta Ekindarrek gaur iragarri dituzten hamar puntu berriak martxan direnean, kendu egingo dute Azoka Plazaren ondokoa, eta San Martin estratakoa izango da erabilgarri haren ordez.
Enpresetan ere bai
Herriko enpresek ere birkarga puntuak ezar ditzaten sustatu nahi du Azpeitiko Udalak. Horri lotuta, otsailaren 20an erakundeko ordezkariek bilera egin zuten interesa izan zezaketen enpresetako kideekin, eta esleipenaren oinarrietan ekarpenak egin ahal izateko epe bat zabaldu du udalak. Birkarga puntu horiek ere 22 Kw-ekoak izango lirateke.