Martxoko guraso eskolen barruan, beste solasaldi bat izango da bihar, asteartea. Kultur aniztasuna eta arrazakeria izenburupean eskainiko dute hitzaldia, Itziar Gorostidi eta Abdoulaye Sarr SOS Arrazakeria elkarteko kideek.
Arrazakeriaren jatorriaz, narratiba berrien eraikuntzaz eta gizartean dauden rolei buruz ariko dira, besteak beste. Elebitan izango da solasaldia, 18:00etan, Basazabal jauregian.
Hirugarren eta azken hitzaldia hilaren 27an, ostegunez, izango da. Migrazio prozesuak izango dituzte hizketagai, batez ere, horri lotutako zurrumurruak eta jarrerak. Xabier Aierdi Begirune fundazioko kideak eskainiko du saioa.