Euskaraldian, hizkuntza ohiturak euskarara ekartzeko maiatzaren 15etik 25era egingo den ariketa sozialean, parte hartzeko norbanakoek izena emateko epea joan den larunbatean zabaldu zuten. Ahobizi edo belarriprest gisa eman dezakete izena herritarrek, eta baita Euskaraldia Hikan ere.
Internetez Euskaraldia.eus webgunean eman daiteke izena, baina aurrez aurre izena eman nahi dutenentzat bihar ostirala eta etzi igandea mahaiak jarriko ditu Euskaraldia antolatzeko Azpeitiko batzordeak.
Bihar, ostirala, Sanjuandegin jarriko dute Euskaraldian izena emateko mahaia, 18:00etatik 20:00etara. Igandean, berriz, Euskelelea musika eta dantza emanaldiaren aurretik, 16:30etik 17:30era, Soreasu antzokian egongo da Euskaraldidian izena emateko aukera.
Hurrengo bilera, martxoaren 27an
Euskaraldia antolatzeko Azpeitiko batzordearen hurrengo bilera martxoaren 27an, osteguna, izango da 18:00etan, Basazabal jauregian. Herritar guztientzako bilera irekia da, eta nahi duten guztiek bertan parte hartzeko aukera dute.