Hizkuntza ohiturak euskara ekartzeko ariketa soziala maiatzaren 15etik 25era egingo da aurten, eta bertan belarriprest nahiz ahobizi gisa parte hartzeko izen ematea zabalik dago martxoaren 15etik. Ostegunean, apirilaren 3an, berriz Euskaraldiaren Azpeitiko hamaikakoa aurkeztuko du Azpeitiko lantaldeak.
Festa giroan egingo dute etzi aurkezpen ekitaldia. 18:30ean, kalejira egingo dute Juan Antxieta musika eskolako trikitilariek, eta segidan, 19:00etan hasita, aurkezpen ekitaldia izango da Sanagustin kulturgunean, eta han jakinaraziko dituzte hamaikakoa osatuko duten belarriprestak eta ahobiziak zeintzuk diren. Bukatzeko, ekitaldira bertaratzen direnek mokadutxoa egiteko aukera izango dute, Kantu Jira taldekoek girotuta.
Internetez euskaraldia.eus webgunean eman daiteke izena, baina Azpeitian bertan ere mahaiak jarriko dituzte Euskaraldirako izena emateko.
Honako egunetan eta tokietan jarriko dituzte Azpeitian Euskaraldirako izena emateko mahaiak:
- Apirilak 4, ostirala, plazan, 18:00etatik 20:00etara.
- Apirilak 10, osteguna, Sanjuandegin, 18:00etatik 20:00etara.
- Apirilak 29, asteartea, plazan, 09:30etik 11:30era.
- Maiatzak 9, ostirala, plazan, 18:00etatik 20:00etara.