Maiatzaren 17an izango da aurtengo Etxera Eguna, eta egun horren antolatzaileek dagoeneko jakinarazi dute zein musika taldek eskainiko dituzten eguna borobiltzeko kontzertuak.
Hain zuzen ere, The Friday's Crew, Su ta Gar eta Trikidantz taldeek doako emanaldiak eskainiko dituzte, Sanagustin kulturgunean, 21:00etan hasita. Talde horien artean bada agertokietara egun horretan itzuliko den talde bat: The Friday's Crew. Hainbat urteko ibilia eginda, oholtzak uztea erabaki zuten taldeko kideek, baina datozen hilabeteetan hiru emanaldi eskainiko ditu, eta horietako bat izango da Azpeitikoa.
Bestalde, antolatzaileek adierazi dutenez, herri bazkariaren ostean Azoka Plazan Txalainak taldeak eskainiko du kontzertua; talde horrek Hertzainak taldearen bertsioak jotzen ditu.
25 urte beteko ditu aurten Elkartasun Eguna izenarekin sortu zuten Etxera Egunak. Egun horretarako hainbat ekintza antolatzeko, hainbat herritarrek eta Azpeitiko Sarek lantaldea eratu zuten duela hilabete batzuk.