Elkar-ekinek egindako deiari erantzunez, azken hilabeteotan hainbat alditan elkarretaratu dira herritarrak Genozidioa gelditu, Israeli boikota lelopean. Sanjuandegiko biribilgunean egin dituzte bilkura horiek, biribilgunea inguratuz, baina formatua denentzat egokiena ez dela ohartuta, aldaketak iragarri dituzte antolatzaileek. "Hainbat herritarrek adierazi izan digute formatua ez dela haurrak egoteko egokia, eta ondorioz horien gurasoek ere ezin izaten dutela bertaratu". Hori horrela, elkarteak jakinarazi du aurrerantzean espaloian espazio bat egokituko dutela gurasoentzat eta haurrentzat.
Elkar-ekinek gogora ekarri du Gazako haurren %2 hil egin dituela Israelek; "genozidio hau hasi zenetik, orduero ume bat", hain justu. "Palestinarrekin gaude, eta beste behin kalean erakutsiko diegu gure elkartasuna". Ostiralean bertan izango da horretarako aukera, 18:30ean, Sanjuandegiko biribilgunean. Mobilizazioan parte hartzeko deia egin die herritarrei.
