Astelehenean hasiko dituzte Etxe Alai auzoaren berrurbanizazioaren bigarren faseko lanak, Azpeitiko Udalak jakinarazi duenez. Otsailean amaitu zituzten auzoaren 4 eta 9 zenbakien arteko atzealdeko obrak, haurren parketik karakol gainera arteko guneari zegozkionak, eta orain aurreko partea berritzeari ekingo diote. Aurreikuspenen arabera, bi hilabete eta erdi beharko dituzte lanak amaitzeko.
Hortaz, kale bat goragoko azpiegiturak berrituko ditu udalak astelehenetik aurrera; besteak beste, espaloiak, eskailerak eta saneamendua berrituko ditu. Horretarako, erakundeak 314.700 euroko inbertsioa egingo du, eta Art Eraikuntzak enpresari esleitu zaio obra.
Gaur egun, Iraurgi ikastetxea irekita egoten da gauetan aparkatzeko, Santutxotik sartuta, baina Etxe Alai auzoaren berrurbanizazioaren bigarren faseko lanek iraun bitartean, goiko partean ere gauez aparkatzeko aukera egongo dela jakinarazi du udalak.
Udalaren arabera, auzoa berrurbanizatzeko hirugarren eta azken fasea epe laburrean aterako da lizitaziora eta, beraz, datorren urtean lan horiek hasteko moduan egongo da erakundea.
Zenbait lan, amaituta
Bestalde, Arana kaleko 9 eta 17 zenbakien arteko espaloia berritzeko lanak gaur, ostirala, amaituko dituztela esan du Azpeitiko Udalak. Halaber, Euskal Herria auzoko bidegorria Azpeititik Azkoitira doan bidegorriarekin lotzeko obrak ere bukatu dituzte.