Urtero egin ohi duen bezala, Azpeitiko Sare Herritarrak euskal presoen, deportatuen eta iheslarien eskubideak errespetatu daitezela aldarrikatzeko baliatuko ditu Gabonak. Horrela, elkarretaratzea deitu du abenduaren 24an, 18:30ean, plazan, Ezin da gehiago luzatu lelopean.
Horrela, urtarrilaren 10ean Bilbon egingo duten manifestazio nazionalerako aukeratutako leloa plazaratuko du Sarek Azpeitian ere, eta Bizkaiko hiriburura joateko deialdia egin die herritarrei. 17:00etan hasiko da urtarrilaren 10eko mobilizazioa, La Casillatik, eta eskubide guztiak lortzeko bidearen "azken zatian" indarrak batzeko ahalegina egingo du Sare Herritarrak. Azpeitiko Sarek iragarri duenez, autobusak antolatuko ditu manifestazio horretara joateko. Orkatzen, Berdien eta Nizan egongo da autobuserako izena emateko aukera.
Bestalde, Sarek euskal presoek eta iheslariek bizi duten egoera aztertzeko eta herritarren artean hausnarketa zabaltzeko batzarra deitu du bihar arratsaldean, 18:30ean, Urola Erdiko Mankomunitateko egoitzaren areto nagusian.