"Azpeitia herri zaintzailea" izateko helburu hartuta, Zaintza Mahaia eratu zuen iazko udaberrian Azpeitiko Udalak. Udazkenean, zaintzen errealitatearen diagnostikoa egin eta jendaurrean aurkeztu zuen, baita herriko zaintza baliabideen berri eman ere beste saio ireki batean. Orain, berriz, Zaintza Plana diseinatzeko garaia dela adierazi du udalak, eta hori osatzeko prozesuan herritarrak parte hartzera animatu ditu. "Zaintza Mahaia arduratuko da planaren lanketaz, eta mahai hori sortuta dagoen arren, ahalik eta ahots gehien biltzea nahi da. Horregatik, herritarrak animatu nahi ditugu bertan parte hartzera", adierazi du udalak.
Zaintza Mahaian parte hartzeko, ez da aparteko ezagutzarik behar, "zaintzei buruzko interesa izatea" nahikoa da, Azpeitiko Udalaren arabera. Nabarmendu dute herritarren beharrei erantzungo dien plan bat egin nahi dutela, eta horretarako, ahalik eta ordezkaritzarik zabalena izatea komeni dela plana osatzeko orduan.
Otsailaren 18an (asteazkena) izango da Zaintza Mahaiaren hurrengo bilera, 12:00etan, San Martin egoitzan. Bilkura horren inguruko informazio gehiago nahi dutenek edota bilerara joaterik ez dutenek eta ekarpenak edota proposamenak egin nahi dituztenek Udal Gizarte Zerbitzuen bulegora jo dezakete, telefonoz 943-15 71 92 telefono zenbakira deituta edota mezu bat bidali gizarte@azpeitia.eus helbide elektronikora.
Zaintza Plana diseinatzeko momentua "fase erabakigarria" da, udalaren arabera. "Azpeitia herri zaintzaile izateko helburuari jarraituz, zaintza plan hori izango delako datozen urteetan jarraitu beharreko bide orria". Ekintza plan bat osatuko dute, non jasoko duten datozen urteetan zaintzen arloan zer gauza zehatz egin nahi diren.