Sanjuandegikoak hasi dira lanean aurtengo auzoko festak antolatzeko, eta auzotarrak girotzen joateko datorren ostiralerako, hilaren 27rako, kantu afaria antolatu dute Iturri elkartean. Egun horretan, Garoa tabernaren aurrean elkartuko dira 19:00etan eta ondoren, 21:00etan, Iturri elkartean egingo dute kantu afaria, Haritz Garmendia eta Eneko Arbeorekin.
Kantu afarirako txartelak jarri dituzte saltzen, 25 eurotan, Haginpe eta Kantoi tabernetan.
Sanjuandegiko festetarako aste batzuk falta diren arren, joan den asteartean egin zuten jaiak antolatzeko aurreneko bilera. Festen antolaketan edota festetan laguntzeko boluntario jardutera animatu ditu XJ Auzolaneanek herritarrak: "Festa hauek auzotar talde baten borondatearekin eta ahalegin handiarekin ateratzen dira aurrera. Hau guztia trukean ezer jasotzeko asmorik gabe egiten dugu, gure auzoagatik, gure festengatik. Denok parte hartzeko eta ondo pasatzeko helburuarekin antolatzen ditugu festa hauek, eta bide horretan, auzotar oro ongi etorria izango da bere ekarpena egiteko edota festetan bere alea jartzeko".