Gaztetxeak Bertsotan sariketaren finalak hartu zuen atzo gauean Azkoitiko Gaztetxea, eta Suhar Gesalaga azpeitiarrak eta Eli Zalduak jantzi zuten txapela, umorea nagusi izan zen bertso saioan. Haiekin batera abestu zuten Aitor Tatiegi eta Iradi Barrenetxeak zein Haira Aizpurua eta Ander Sarriugartek osatu zuten bikoteek, eta horiek ere jaso zuten saririk: Tatiegik eta Barrenetxeak bi pertsonentzako afaria irabazi zuten, eta Azkoitiko Gazte Asanbladaren saria, berriz, Aizpuruak eta Sarriugartek jaso zuten; Kaku zakelaren mozorro bana, alegia.
Zaleek Gaztetxea goraino bete zuten atzoko finala ikusteko, eta Iñaki Goenaga zein Nora Unanue gai jartzaileek gidatuta egin zituzten bertsoak hiru bikoteek. Ohiko lanak ez ezik, askotariko ariketak egin zituzten bertsolariek, hainbat jolasetan oinarritutakoak zein segidillak, besteak beste.
(Argazkiak: Gaztetxeak Bertsotan eta Azkoitiko Gazte Asanblada)