Erremintako Gipuzkoako Herriarteko Pilota Txapelketaren azkenaurreko koskan gelditu da lehiatik kanpo Azpeitia. Txapela janzteko faborito nagusienetakoarekin jokatzea tokatu zaie Ilunpekoei finalaurrekoetan, Andoainen kontra; eta atzo Betharramen bana egin bazuten ere, ez zen nahikoa izan, Andoainen jokatutako joanekoan 2-0 galdu baitzuten Azpeitikoek.
Atzo, larruzko paletan, Oier Alkortak eta Asier Egiguren Bikutze-k 35-25 irabazi zuten, Andoainen jaso zuten porrotari emaitza berberarekin erantzunez. Pala motzean, hemezortzi tantogatik galdu zuen Azpeitiak Andoainen, eta horri buelta ematerik ez zuten lortu Eneko Martijak eta Mikel Sanchezek; joanekoan baino tanteo estuagoarekin (40-30), baina galdu egin zuten itzulerakoa ere.
Ilunpeko erreminta saileko kideak gustura daude aurtengo Gipuzkoako Herriartekoan egin duten bidearekin eta erakutsi duten mailarekin. Goi mailan dabiltzan Alkorta eta Martija zein taldean maila ona emanez urteak daramatzaten Sanchez edo Bikutze ez ezik, atzetik jarraipena dutela nabarmendu dute, Telmo Garaizar, Mikel Gurrutxaga edota Urritz Goenaga kadeteekin, esaterako. Horiekin eta eskolako beste gaztetxoekin lanean jarraitzeko gogoz eta babesleei eskerrak emanez esan diote agur denboraldiari Ilunpeko erreminta sailekoek.