EITBk urrian estreinatuko du Azpeitian grabatutako Superra telesaila. ETBn eta Primeran plataforman ikusi ahal izango da Anjel Alkainek eta Jon Garatek zuzendutako fikziozko lana, joan zen otsailean eta martxoan Irentzaileneko denda zenean grabatu zutena.
Erdikaleko lokal horretan jardun zuten bi hilabetez grabaketetan, Super Manterola izeneko saltokian. Alkain bera eta gidoiak idazteaz arduratu diren Iker Galarza eta Aitziber Garmendia dira telesaileko beste aktoreetako bi, eta haiekin batera osatu dute taldea Sara Cozarrek, Zuhaitz Gurrutxagak eta Ainere Tolosak. Azpeitiko aktore bat ere bada zerrendan: Ekain Ibarguren.
Oraindik ez dute jakinarazi noiz hasiko diren telesaila ematen, baina udaren ostean izango dela bai: urrian, hain zuzen ere.