Nagore Aranburu aktore azpeitiarra protagonista duen Querer sariarekin itzuli da telesailen jaialdirik garrantzitsuenetik. Hain zuzen, Lilleko (Frantzia) Series Mania jaialdiko sail ofizialean lehiatu da Alauda Ruiz de Azuak zuzendutako telesaila, eta Nazioarteko Lehiaketa ataleko sari nagusia jaso du.
Munduko hainbat txokotan ekoiztutako beste zortzi telesailekin lehiatu da Querer: Empathie(Kanada), Generations(Danimarka), Hal & Harper (AEB), Kaboul (Frantzia-Alemania-Italia-Belgika-Grezia), Long Bright River (AEB), Mussolini: Son of the Century (Italia-Frantzia), The Deal (Suitza-Frantzia-Luxenburgo-Belgika) eta The German (Israel-AEB).
Iazko irailean Donostian estreinatu zutenetik, aitortzak, sariak eta kritika onak pilatzen jarraitzen du azpeitiarra protagonista duen lau ataleko telesailak. Izan ere, hiru Forque eta bi Feroz sari jaso ditu telesailak, eta Aranburu ere bi jaialdietan saritu dute. Bikote barruko tratu txarrak eta sexu abusuak dira telesailaren ardatza, eta Movistar Plus plataforman ikus daiteke.