Martzelino Albizu, Mutrikuko Olatz auzoko Albizu ganadutegiko laguna hil da, 88 urte zituela. Azpeitiko sokamuturrean urte askoan ibilitakoa da; aski ezaguna hemen, beraz. Gaur egun Anton semeak eta honen emazte Lourdes Udabek daramate ganadutegia. Bihar (asteazkena) izango da haren aldeko hileta elizkizuna, Mutrikuko parrokian, 19:00etan.\
\
Martzelino bera lau urte zituela joan zen Lasturtik Olatz gertuko baserri batera bizitzera: Etxerre-ra. Pare bat behi zituzten orduan, eta trenean eta ahal zen moduan eraman zituzten.\
\
Haren zezenak Azpeitiko sokamuturrera aurreneko aldiz 1971n etorri ziren. Hain zuzen, 'Botijo' idiskoa ekarri zuten; baita jendeak gustura hartu ere. Dauden datuen arabera, 'Botijo'-k dauka errekorra Azpeitian: 13 urtean segidan aritu zen. 19 urte zituela kendu zuten. \
\
Zezen hari buruzko pasadizoak badira 'Azpeitiko sokamuturra. Soka ez da eten' dokumentalean (http://uztarria.com/azpeitia/liburuak/19_Soka_ez_da_eten/index_html). Esaterako, lan horretan Luis Angel Etxeberria sokamutil ohiak kontatzen duen bezala, Martzelino Albizuk esan izan zion German Rekejo sokamutilak 'Botijo'-rekin lo egingo zuela; hain ondo konpontzen ziren biok...\
\
Lehen, orain aldean ganadutegi gutxiago etortzen zen Azpeitira, eta, karnabaletan-eta egunero joan-etorrian ez ibiltzearren, Martzelino Albizuk, esaterako, Sanjuandegiko etxe batean hartzen zuen ostatu: Joxe Urbieta Barrenetxearen etxean. Hau haren baserrian lan egindakoa zen, izan ere.\
\
Albizu ganadutegiak segitzen du Azpeitira etortzen. Herrian 30. urtea zuenean erreportajea egin zuen Uztarria aldizkariak: http://uztarria.com/herri_aldizkaria/2000/05/01Sokamuturra/index_html\
\
Argazkian, Martzelino Albizu Etxe Zurineko ikuiluan ageri da, bertako Pedro Arrieta zenarekin.
Azpeitia Gukak zu bezalako irakurleen babesa behar du tokiko informazioa euskaraz eta modu profesionalean lantzen jarraitzeko.
Izan Gukakide
Izan Gukakide