Azpeitiko Udalak, Kirol Mahaiko kideekin elkarlanean, urteko Kirol Sarien ekimena berritzea erabaki du, bi helburu nagusirekin: herritarren partaidetza areagotzea eta emakumezkoen kirolari merezi duen ikusgarritasuna ematea.\
\
Hori dela eta, aurten, hiru sari banatuko dituzte; urteko emakume kirolariaren saria, urteko gizon kirolariaren saria eta kirol boluntarioaren saria. \
\
Izarraitz Igeri Elkartearen hautagaiak honako hauek dira;\
\
• Emakumezkoen kategorian, Maialen Aizpuru, Eva Astigarraga eta Aiora Beristain, 2000. urteko juniorrak.\
• Gizonezkoen kategorian, Juankar Arellano, master taldekoa.\
\
Bihar, abenduak 17, zapatua, 2016ko Kirol Sariak emateko ekitaldia egingo da, 12:00etan, udaletxean.\
\
Zorionak eta disfrutau ekitaldian!\
\
\
Bestalde, bihar zapatua eta 16:00etan, Tolosako Usabal kiroldegian XVII. Paco Sanchez Saria jokatuko da.\
\
Gure taldean dabiltzan 2004-2008 urteen bitartean jaiotako umeak izango dira bertan. Urte sasoi honetan ligako jardunaldietatik aparte hainbat txapelketa egoten dira eta aurtengoan Tolosara joatea erabaki da; txapelketa horrek formatu erakargarria du eta hori izan da arrazoi nagusia.\
\
2004., 2005. eta 2006. urteetan jaiotakoek aukeratutako bi probatan egin ahal izango dute igeri, eta 2007. eta 2008. urteen artean jaiotakoek proba bakarrean.\
\
Banakako probez gain, erreleboak ere izango dira. Bertan, 12×50 libreetan igerian ikusi ahal izango ditugu.\
\
Tolosara autobusez joango gara eta abiatzeko hitzordua 14:00etan izango da, igerileku aurrean.\
\
Zorte on denei!\
Azpeitia Gukak zu bezalako irakurleen babesa behar du tokiko informazioa euskaraz eta modu profesionalean lantzen jarraitzeko.
Izan Gukakide
Izan Gukakide